اسمح لى يا دكتور أنا إتأثرت جدا بالفيديوهات عن سورة يوسف ، بس عملت لى مشكلة . أنا فهمت ان يعقوب عليه السلام كان بيفضّل ابنه يوسف ، ويمكن ده عشام شاف فيه أمارات النبوة وكان وسيم جدا . الفيدوهات دى خلتنى أفكر فى حالى مع ولادى . وعرضت الأمر على أخويا وهو من علماء الأزهر وقلت اللى عايز أعمله مع ولادى فرفض . قلت أعرض عليك الموضوع . انا عندى تلات ولاد . صرفت عليهم وعلمتهم اعلى تعليم .أكبرهم سافر انجلترة وانقطعت عنا أخباره ، لا يسأل عنى ولا عن أمه . ولا نعرف اتجوز ولا لأ . التانى عايش فى نفس المدينة وموظف كبير وامراته موظفة وزميلته . وعنده بنتين هم نور عينينى أنا وامه . المشكلة ان مراته مسيطرة عليه وهو ماشى وراها ، وعارفه اننا عايزين نشوف البنتين ، وتفتعل خناقة ومشاكل عشان تبعد ابنة واحفادى ، مع ان جدتهم وانا بنعاملها كويس لكن زى ما قلت بتكره حماتها ز الابن الصغير ربنا يحميه ويحرسه ، هو اللى عايش حياته عشانا ، وكل يوم تقريبا يزورنا بامراته وابنه ، ولو حصل مرض أو أى شىء طارىء لى أو لأمه بيبقى زى المجنون من حبه لينا . ربنا عوضنا بيه عن اخواته الكبار . أنا حالتى ميسورة ، وعندى أملاك . وعايز أكتب معظمها لابنى الصغير . عايز أكافئه وأعمل له أى حاجة عشان هو يستاهل . قلت لاخويا الشيخ الأزهرى رفض وقال ده ظلم ، وحرام ولازم تعدل بين أولادك ، وقال لى انت حُر فى مشاعرك بس لازم تكون عادل مع اولادك . أعمل ايه يا دكتور ؟