الدولة تقضي على الموهوبين وتطردهم!

الأربعاء ٢٦ - أغسطس - ٢٠٢٦ ٠٥:٠١ مساءً

عثمان محمد علي Ýí 2026-08-26

		الدولة تقضي على الموهوبين وتطردهم!

		كنت أتفرج على لقاء للدكتور (زويل – يرحمه الله) يتكلم فيه عن العلم وقيمة العلم وأهمية العلم في إنقاذ الشعوب، وانتشالها من عثراتها وفقرها. ومستمتع باللقاء، وبالدرر التي ينطق بها، وأتمزج معها بكوب عصير مانجو من مانجو الإسماعيلية الطبيعية، مش المرشوشة بمواد مسرطنة اللي مالية البلد.

		فإذا بالتليفون:: ألو:: صديقي الأستاذ سعد الدين::

		سأمر عليك لنذهب ونبارك للأستاذ محمود، ابنه نجح في ثانوية (مدارس ستيم).

		قلت له:

		حاضر، منتظرك.

		جاء صديقي::

		قلت له:: تعال هنا الأول: هي الثانوية مش خلصت والعيال نجحوا من شهر؟ وإيه ثانوية ستيم دي،هو ابنه بيدرس برة ولا إيه؟؟

		صديقي::

		ههههههههههه أنت مش عايش معنا:::

		مدارس ستيم دي: مدارس متفوقين عملتها الدولة من 2011، بتاخد العيال المتفوقين في الإعدادية على مستوى الجمهورية كلها. وهي مدارس داخلي، يعني العيال ساكنة في سكن تبع المدرسة، وبيدرسوا مناهج كيمياء وفيزياء وأحياء ورياضة مكثفة ومتقدمة، ومعامل، وتجارب، ومشروعات دراسية زي مشاريع تخرج طلاب الهندسة، ومشروع سنة رابعة صيدلة في مادة العقاقير والنباتات الطبية، مشاريع تقوم على البحث والتجربة وحل المشكلات.

		قلت::

		إيه الحاجة العظمة دي! شوقتني نروح نبارك لهم ونسأل عن نظام التعليم الفاخر ده.

		ذهبنا أنا وصديقي، خبطنا على باب البيت:

		الأستاذ محمود:

		يا مرحبا، أهلاً وسهلاً، اتفضلوا اتفضلوا.

		دخلنا:: ألف ألف مبروك يا أستاذ محمود لعريس الليلة ابنكم، وإن شاء الله يبقى متفوق على طول، وتشوفوه عالماً كبيراً.

		الأستاذ محمود:

		هاتوا الشربات يا جماعة، وتعال يا طارق سلم على أعمامك عايزين يباركوا لك.

		طارق:: مساء الخير.

		أهلاً يا بطل، ألف ألف مبروك:: الحمد لله إنك اجتزت كابوس الثانوية العامة، وكمان بتفوق.

		هيه يا بطل، عايز تدخل إيه بقى؟؟ طب ولا صيدلة، ولا أقول لك هندسة أحسن، ولا علوم حاسب وذكاء اصطناعي، ولا علوم؟؟

		طارق::

		بص لنا وانخرط في البكاء زي اللي فقد عائلته كلها في حادثة/ وكان حيموت مش قادر ياخد نفسه... قمت بسرعة واحتضنته وحاولنا نهديه ونطبطب عليه: إيه يا طارق في إيه يا حبيبي؟ إيه يا محمود أنت مزعله ولا إيه؟؟ إهدى يا طارق: اللي أنت عايزه حنعملهولك، حد يزعل وهو ناجح وجايب 98% يا راجل؟؟

		الأستاذ محمود::

		روحنا نقدم في التنسيق، وتنسيق مدارس ستيم للمتفوقين بيكون متأخر عن تنسيق الثانوية العامة، فوجئنا بأنهم غيروا النظام، بأنه أصبح توزيعاً جغرافياً، وأن أماكن طلاب ستيم في كليات القمة (الطب – الصيدلة – طب الأسنان – الطب البيطري – الهندسة – العلوم – الحاسبات والمعلومات – التخطيط العمراني) محدودة.

		مثلاً: مكانين فقط في الطب، و4 في الصيدلة، و5 في الهندسة وووو... وأن عدد الطلاب 20 ضعفا. وكلهم جايبين فوق الـ 97%، ومجموعهم أعلى من زملائهم بتوع الثانوية العامة العادية. وكمان هم خريجو مدارس سوبر متفوقين، ونظام تعليمهم أرقى وأحدث، ومصروف عليهم من الدولة نفسها، ويجوا في الآخر يقولوا لهم: (آسفين معلش، مالكوش أماكن في كليات القمة اللي علمناكم كويس علشان تكملوا فيها، وتقودوها وتقودوا قطار تقدم المجتمع بعد كده. ومعلش مش قدامكم إلا الكليات النظرية: تجارة وآداب وخدمة اجتماعية وحقوق ومعاهد فوق المتوسط)!

		أنا ما بأقللش من الكليات النظرية، لكن هم ما اتعلموش تعليم صعب وتجارب ومشاريع تخرج في الفيزياء والكيمياء والرياضة وووو علشان يدخلوا تعليم علمي تطبيقي، وفي الآخر يقفلوا قدامهم باب التعليم اللي هم عايزينه واللي بيفهموا فيه!!!!

		فالولد، وإحنا، وكل طلاب مدارس ستيم للمتفوقين وأهاليهم حصل لنا نكسة وهزيمة وإحباط أشد من هزيمة 67!!!!

		إنتم اللي اخترتم الطلاب المتفوقين (والذكاء موهبة نادرة من عند ربنا)، وقلتم لنا حناخدهم نعلمهم تعليم عالي وراق وحديث في مدارس متخصصة، وصرفتوا عليهم، والعيال عملوا اللي عليهم ونجحوا بسوبر تفوق، وفي الآخر تقفلوا أبواب كليات تخصصاتهم في وجوههم ليه؟؟

		واحد دارس فيزياء ورياضة بتفوق وجايب 100% فيهم يدخل كلية آداب قسم لغات قديمة إزاي؟؟؟؟ مكانه هندسة مش آداب ولا تجارة ولا حقوق.

		توزيع جغرافي إيه اللي الوزير نام من غير ما يتغطى، وقام قبل ما يروح الحمام أخرج لنا قراراً بالالتزام بالتوزيع الجغرافي في التنسيق وبمحدودية أماكن الطلاب المتفوقين في الكليات العملية؟؟؟

		هو عارف هو عمل إيه بقراره الغبي ده؟؟

		وسألنا بتوع التنسيق، وروحت أنا بنفسي لرئيس الجامعة وشرحت له الموقف..

		وكان رده: أنا متفهم، ولكن للأسف هذه قرارات وزارية ومن الدولة، ولا أستطيع مخالفتها. وكمان كل كلية عملية أخدت كفايتها من الأعداد المسموح بها هذا العام، ومعندناش أماكن لطلبة زيادة فيها.

		فقلت للأستاذ محمود:

		هل في إمكانية إن طارق يدخل كلية طب أو صيدلة أو هندسة خاصة؟

		الأستاذ محمود:

		وأجيب ربع مليون جنيه رسوماً كل سنة غير مصاريف السكن ومعيشته هو منين يا دكتور؟؟ ما أنت عارف أنا موظف، ومرتبي يادوب بأدفع به الإيجار والفواتير والعيش. ومرتب الأستاذة بنكمل به ضروريات الأكل والشرب والمواصلات.

		قلت مع نفسي من غير ما أتكلم قدامهم علشان ما أزودش همهم أكتر وأكتر::

		معقول في دولة في العالم في الوقت ده، وقت عصر العلم والتكنولوجيا، عصر المنافسة في التعليم، وعصر العالم كله أيقن أن التعليم هو الحل وهو الإنقاذ وهو المُنقذ للشعوب، تعمل كده في نفسها؟؟

		تختار الموهوبين، وتعلمهم، وتصرف عليهم ملايين وبعد كده تطلع لهم لسانها وتضربهم بالشلوت وترميهم في الشارع؟

		هي مش حتبطل تطرد الموهوبين والشطار، وتضطهدهم وتقضي عليهم؟

		وفي الآخر عايزة انتماء!!!!!

		طيب إزاي، لما بتطرديهم في الشارع وتسيبيهم، يا إما يهاجروا، أو يشموا كُلة، أو يبقوا سائقي توكتوك، أو فريسة لتجار المخدرات والإرهابيين؟؟

		وزارة إيه، ووزير إيه، وإدارة إيه اللي بتاخد قرارات مش عارفة نتيجتها على الناس، ولا على أولادنا اللي ربنا أكرمنا بهم وظهرت موهبتهم ونبوغهم بدري، وممكن يكونوا جزءاً كبيراً من الأمل في إنقاذ البلد دي من المستنقع اللي غرقت فيه؟؟

		هي قرارات الوزير غير المحترم والحكومة غير الرشيدة آيات قرآنية تتلى على الناس فلا يجوز مراجعتها وتغييرها؟

		لو عدو الدولة الأول والشيطان نفسه عايز يضر مصر، مش حيعمل فيها زي اللي الإدارة دي بتعمله فيها وفي شعبها.

		==

		معقولة يبقى عندك عيال موهوبون زي محمد صلاح (لكن في التعليم وتحصيل وتطبيق العلم) وتقول لهم آسف مالكوش مكان عندي لأن العدد اكتمل؟؟

		بتعمليها إزاى يا مصر ؟؟

		صوتي يا إنشراح، وهاتي معاكي فرقتك تصوت قدام باب رئيس الوزراء وحكومته.

		وقولي لهم (أحييييييييييييييييييييه) بالإسكندراني عليكم وعلى اللي جابكم لإدارة مصر / مصر بلد أعظم وأقدم حضارة في التاريخ.

اجمالي القراءات 46

للمزيد يمكنك قراءة : اساسيات اهل القران

أضف تعليق

لا بد من تسجيل الدخول اولا قبل التعليق

بطاقة عثمان محمد علي

تاريخ الانضمام	:	2006-07-24
مقالات منشورة	:	1181
اجمالي القراءات	:	9,414,686
تعليقات له	:	6,524
تعليقات عليه	:	2,756
بلد الميلاد	:	Egypt
بلد الاقامة	:	Canada