حظى نحس . إختار لى أبى بنت ابن عمه زوجة. مات أبوها وعاشت فى القاهرة فى رعاية أمها . وأبوها قبل ما يموت كتب لزوجته كل أملاكه ، وجعل لها حق التصرف فى التركة ، يعنى البنت والأولاد لا يملكون أى شىء فى حياة أمهم . تم الزواج بعد موت عمى. أنا أعمل فى القاهرة واسافر الى البلد ، وهم لهم بيت فيه شقة لمراتى وشقة لكل ولد بالاضافة الى شقة حماتى . حماتى اعتبرتنى طماع وحاطط عينى على شقة مراتى لأنى عشت معاها فى الشقة. ثارت المشاكل ووصلت الى حد ان حماتى رمت ملابسى فى الشارع . وزوجتى مغلوب على أمرها. تركتها ورجعت أسافر لعملى من بلدنا الى القاهرة ، ووبعد محاولات الصلح أخدت مراتى لتعيش فى بيتنا فى البلد وسارت الأمور على أحسن حال وبقينا سمن على عسل ، وحملت مراتى وولدت بنتى. وأصبحت حماتى تزورنا وفى كل مرة تتسبب فى مشاكل بينى وبين مراتى .وآخر مرة خدت مراتى وبنتى وصممت على الطلاق. حاولت المستحيل لكن إكتشفت أنه فيه عداوة قديمة بين أمى الله يرحمها ومراة عمى اللى هى حماتى ، وأنا ومراتى بندفع التمن. صممت حماتى على طلاقنا. وزوجتى موافقاها. وتم الطلاق . وأحاول أن أرى بينى ولكن حماتى ترفض وعينت محامى ودخلنا فى متاهات ، نفسى اشوف بنتى ,آخدها فى حضنى . ومراتى السابقة ترفض الزواج وهى تحبنى وأنا عرف لكن شخصيتها ضعيفة وأمها تهددها بحرمانها من حقها فى تركة أبوها. أعمل ايه يا استاذ .أنا مرتبى لا يتحمل مصاريف المحامين وحماتى بتصرف شمال ويمين ..