أين فقه الأولويات يا محترمين؟؟؟
لا أتحدث عن (الفقه الإسلامى ) ولكن عن فقه الأولويات فى إنفاق أموال وموارد الدولة ..
أصدرت مصر فى هذا الشهر قانون وقرارات كارثية .
القانون هو قانون طرد السكان من مساكنهم بعد 5- 7 سنوات ، والقرارين هما ترميم وتجديد مساجد بالأوقاف بمبلغ 23 مليار جنيه .
والقرار الآخر تكهين وتصفية مجمع مصانع الحديد والصلب بحلوان وبيعها خردة ،وتحويل أرضها لمجمع للغزل والنسيج .
وهنا نسأل بهدوء . هل إستعدت مصر ببناء مساكن ومحلات تجارية ووحدات إدارية لتأجيرها للمطرودين مُستقبلا بإيجارات معقولة ؟؟؟
الإجابة لا وألف لا ..
طيب أكيد سيبدأون فى تنفيذ هذا المشروع الضخم الذى يحتاج إلى 3 مليون شقة ومليون محل تجارى وصناعى وخدمى من الغد لتنتهى منه قبل 5 سنوات ،صح ولا لا ؟؟؟ المفروض يعملوا كده .
طيب المبانى دى مش محتاجة حديد وصلب ووووو من مشتقات الحديد ؟؟
نعم صحيح .
طيب نحاول ترميم وتجديد مدينة صناعة الحديد والصلب بحلوان لتُساعدنا فى تلبية إحتياجات السوق من الحديد والصلب لبناء الوحدات الجديدة ولا نقفلها ونكهنها ونبيعها خُردة ؟؟؟
المفروض فعلا يرمموها ويجددوها بسرعة لتساعد فى إنتاج مستلزمات الحديد المطلوبة .... لكن ::: هل معنا فلوس نرممها ونجددها ؟؟
أكيد معنا فلوس بدليل ال23 مليار جنيه اللى حيصرفوهم على تجديد فرش وأرضيات ومكيفات وميكرفونات المساجد مع إن المساجد غير محتاجة ، وممكن ننتظر 5 سنوات على تجديدها (لو محتاجة فعلا) فضلا عن أن لها موارد مالية أخرى غير ميزانية الدولة ....
وهل مصر فى حاجة مُلحة لمجمع غزل ونسيج ،ولو فى حاجة ملحة ملقتوش غير أرض مصانع الحديد والصلب ؟؟؟؟
مصر عندها المحلة الكبرى ،وشبرا الخيمة ، وكفر الدوار ودمنهور والمنوفية والعاشر من رمضان ،ومجمع الغزل الجديد ووووووووو وعندها 800 الف كم2 صحراء ممكن تبنى فيهم مجمعات للغزل والنسيج زى ما هى عايزة.
فلماذا إعدام مصانع الحديد والصلب الحكومية الموجودة والمنتجة بالفعل ،ولماذا تباع خردة وبتراب الفلوس ، ولمصلحة من ؟؟
للعمولات والسمسرة فى بيع الماكينات ، وبيع الأرض بتراب الفلوس ، وبفتح الطريق أمام مصانع (احمد عز ) و(ابو هشيمة مندوب مشايخ الإمارات فى مصر ) وأمام مستوردى الحديد من السعودية وتركيا وعمولات الإستيراد .
وربنا يخلى لنا الهيئة الهندسية وكامل الوزير وكل حاجة مكتوبة فى نهايتها (وطنية أو الوطنية) .
ودى قمة الذكاء عندهم فى تطبيق فقه الأولويات .هدم المشروعات القائمة وبيعها خردة ،وتحويلها لمصانع وأفران كجك وبسكويت وقمصان نوم وبدل رقص بلدى .