حضرة القاضى انت لابس الجزمة  فين ؟؟

فى اليوم التالى للإعتداء الوحشى وللحادث الإرهابى الذى قُتل  فيه اكثر من 350 مُصليا فى صلاة الجمعة  بمسجد الروضة بمنطقة بير العبد بشمال سيناء ،حدث هذا المشهد التخيلى العبثى فى محاكمة الشيخ ((محمد عبدالله نصر )).

بعد  مشهد عبثى نطق فيه  القاضى  بسجن الشيخ محمد عبدا لله نصر خمس سنوات مع الشغل قام رجل من الحضور ونادى على القاضى .

حضرة القاضى  يا حضرة القاضى ، ممكن سؤال .

القاضى  انت مين ،وعايز إيه .

الرجل .   انا اب لإثنين قتلهم الإرهاب امبارح فى الجامع فى العريش ،وهم رايحين يسترزقوا ويشتغلوا فى مزارع الزيتون هناك . وده جارى المقدس مكرم ،الإرهاب قتل مراته وعياله فى كنيسة العباسية السنة اللى فاتت.

وعايز اسألك سؤال ... هو انت  لمؤاخذة لابس الجزمة فين ، فى رجلك ولا فى راسك ؟؟؟؟؟؟؟؟

القاضى .إتجنن  انت بتقول إيه يا راجل يا مجنون انت ، والله لولا انك مقتول لك ولدين امبارح  وحالتك صعبة كنت سجنتك 3 سنين لإهانة القضا و3 سنين علشان بتشتمنى  .

الراجل ... مش تتعصب وتتنرفز قوى كده .واسألنى ليه سألتك السؤال ده .

القاضى .. تانى تانى .. فرد مستشار واقف جنب القاضى وقال ، ليه يا حاج .

الراجل . يا حضرة القاضى انا دفنت اولادى الفجر وجت على المحكمة علشان اقدم بلاغ فى اللى قتلوهم ،فوكيل النيابة قال لى . لازم تجيب لنا اسماء وعناوين  اللى قتلوا ولادك علشان نقدر نحقق معهم  .

فطلعت من عنده مش قادر اجر رجلى ولا ارفع ضهرى ،ودخلت الأوضة دى  اقعد وارتاح شوية .وبعد كده  دخلوا ناس ومحاميين وقعدوا يتكلموا بصوت عالى ويتخانقوا ،وناس تقول ( محمد نصر ) ده كافر وإرهابى ومنكر سنه  وعايز يقلب البلد ، وناس تقول حرام عليكم ده هو اللى بيحارب الإرهاب والكتب بتاعته ،وعلشان كده الأزهر والمشايخ رفعوا عليه القضية ....

 فقلت بس انا حأقعد احضر القضية  يمكن يكون (محمد نصر ) ده هو الإرهابى  اللى بأدور عليه ،او حتى يعرفهم ، فأبلغ فيه انه هو اللى قتل ولادى او حتى يكون عارف اللى قتلوهم .

وبعد ما سمعت وشوفت تحقيقاتكم معاه وكلامه معكم  وكلام المحامين وهم بيردوا على بعض  .عرفت انكم بتحاكموه علشان قال (( ان النبى عليه الصلاة والسلام ما انتحرش ،ولامات مقتول )) و ان الراجل اللى إسمه البخارى هو اللى قال كده (ان النبى حاول الإنتحار اكتر من مرة ) ، وان الشيخ (الطيب )  شيخ الأزهر و(وزير الأوقاف ) و(الدولة ) زعلانين منه  لأنه طلّع (البخارى كداب) ، وانه كده لمؤاخذه خلاهم كلهم (حمير ) وما بيعرفوش حاجه ، فرفعوا عليه قضية وقالوا عليه كافر ... وانتوا بدل ما تنصروه وتدافعوا عنه حكمتم عليه بالسجن !!!!

إلا قول لى يا بيه هو النبى إنتحر  صحيح ، ولا مات مقتول زى ما البخارى ما بيقول ؟؟؟

القاضى .. هو انت حتعرف ان النبى انتحر ولا ما انتحرش اكتر من سيدنا البخارى ،ولا فضيلة الإمام ومشايخنا الكرام يا مجنون انت ولا محمد نصر بتاعك ؟؟

يابيه ،ياحضرة القاضى ، الشيخ (الطيب ) والمشايخ هم اللى بيقولوا ان النبى عليه الصلاة والسلام  انتحر ومات مقتول ، يا بيه يا حضرة القاضى  احكم عليهم هم بالسجن  مش  على الشيخ عبدالله  نصر .

يا بيه البس الجزمة عدل ،البسها فى رجلك وبلاش تلبسها فى راسك .

==

المستشارين اخدوا القاضى وخرجوا من القاعه  –وجت  العساكر وجروا الشيخ (نصر ) من رقبته ،وداسواعلى  نظارته اللى وقعت منه على الأرض  وكسروها ،وخرجوا من القاعة وهو بيقول ((قُل لَّن يُصِيبَنَا إِلَّا مَا كَتَبَ اللَّهُ لَنَا هُوَ مَوْلَانَا ۚ وَعَلَى اللَّهِ فَلْيَتَوَكَّلِ الْمُؤْمِنُونَ  )).

و مجموعة من  الدقون تهتف وتقول  ( إلى السجن يا عدو الله ،هذا جزاء من يتطاول على سيدنا البخارى ،وعلى علماء الأُمة ) .

ومجموعة صغيرة واضح انها من عائلة وأصدقاء الشيخ نصر  بيقولوا ((رَبَّنَا افْتَحْ بَيْنَنَا وَبَيْنَ قَوْمِنَا بِالْحَقِّ وَأَنتَ خَيْرُ الْفَاتِحِينَ ))    وبيقولوا  ((رَبَّنَا أَخْرِجْنَا مِنْ هَٰذِهِ الْقَرْيَةِ الظَّالِمِ أَهْلُهَا وَاجْعَل لَّنَا مِن لَّدُنكَ وَلِيًّا وَاجْعَل لَّنَا مِن لَّدُنكَ نَصِيرًا  )).

=

وعاد الرجل الى بيته وصلى ركعتين لله –وجلس يُشاهد الأخبار فى التليفزيون لعله يسمع جديدا عن قتلة اولاده أو ان الدولة توصلت إليهم او قبضت عليهم  .ولكنه وجد قنوات  التليفزيون المصرى كلها مشغولة إما بإنجازات الرئيس فى افتتاحه لقسم البسكويت ابوعجوة بمصانع الإنتاج الحربى !!!!!

اومشغولة  بافتتاح فخامته  لأكشاك بيع السمك المشوى والرز الأحمر .!!

    أو مشغولة بانتصار (مرتضى منصور ) وفوزه على (احمد سليمان ) فى رئاسة الزمالك .

او مشغولة بالحرب الطاحنة بين (محمود الخطيب )و( محمود طاهر ) على رئاسة الأهلى !!!   

وما تبقى من قنوات  مشغولة  بانتصار الدولة الرهيب على المطربة المغمورة (شيما ) بطلة كليب ((  عندى ظروف )) لأنها سرقت اسم الكليب دون مراعاة لحقوق ملكية عوالم وغوازى الحكومة  الفكرية فيه  !!!!

فرفع الرجل سماعة التليفون واتصل بالمقدس مكرم ... ايوه يا مكرم يا خويا .. انت مش قلت لى انك لك قريب فى استراليا عايزك تهاجر هناك معاه ؟؟؟

مكرم .. اه ده صحيح ...

الرجل . طيب .امانة يا مكرم .لو ممكن يساعدنى انا كمان علشان مش قادر اقعد هنا تانى بعد النهارده ، وانخرط الرجل فى البكاء وهويحضن صور اولاده و يقول (وبعدين يا مصر ، وبعدين يا مصر ، رايحه على فين يا مصر ، رايحين بك على فين  تانى ؟؟؟).

==

ملحوظة .هناك جزء حقيقى ، وهو الحادث الإرهابى ،و الحكم على الشيخ عبدالله نصر  بالسجن فى إتهامه بإنكار(محاولة إنتحار النبى ) فى  حديث البخارى، وقنوات التليفزيون المصرى ، وجزء تخيلى هو باقى المشهد .