مجموعة ممنوعات

ممنوع ولا مواطن عم يشارك باعادة انتخاب نفس الطقم السياسي بكل انتخابات يجي ويسأل وينيي الدولة

ممنوع ولا شوفير تكسي يزمّر لشوفير تكسي تاني وقف بنص الشارع، يرجع هوي ذاته نفس الشوفير يوقف بنص الشارع

ممنوع ولا لبناني يسب الدولة لأنها مش ضابطة عجقة السير، يرجع يسب الدولة لأنها عملتله ظبط سير بيستاهله

ممنوع أي شب يحكي عن حب الأرض وهوي بحياته مش ماسك منكوش ولا بيعرف يحوش زيتون

ممنوع أيها المواطن تسرق كهربا وتشتكي من انقطاع التيار الكهربائي

ممنوع اللبناني يسب لبنان بلبنان وبس يوصل ع كندا يحط فيروز ويقعد يبكي

ممنوع تكون عم تناقش خصمك بالسياسة وتبلش معو بجملة سد بوزك وبس يقلك عيب عليك تاخدها شخصية وتزعل

ممنوع يقبل المواطن انو الزعما يقرطوه يومية وياخد ع خاطره اذا حدا من رفقاته قرطه بالصدفة

ممنوع تطلع عالتلفزيون تشتكي ع زعران طايفة تانية وانت يومية بتدافع عن زعران طايفتك

ممنوع ولا مواطن، ولا واحد، مناصرلحزب مشارك بالحكومة، ينق اذا معاشه ما كفاه لنص الشهر

ممنوع ولا بنت تتضايق لأنو حدا لطشها، وترجع تاني نهار دغري تتضايق لأنو ما حدا لطشها

ممنوع ولا عسكري حامل بارودة ومفروز للحراسة قدام السفارة الاميركية يكون بالبيت قدام ولاده ضد اميركا

ممنوع ولا حدا يقول عن حاله انو لبناني صميم ووطني وهوي ما بيعرف وين الهرمل ووين عكار

ممنوع ولا واحد يساري يحكي عن حقوق الفقرا هوي وسكران

ممنوع ولا( بيّ) يسجل ولادو طواعيةً بمدرسة دينية يشتكي من انو عم يجبروله اولاده يصلوا او يجبروهم يقدسوا

ممنوع ولا واحد طائفي بدو يحكي طائفية ليدافع عن طايفته يبلش حكيه دايما بجملة مع انو انا علماني

ممنوع ولا نايب الو بالبرلمان دورتين يحكي عن الاصلاح السياسي والاقتصادي

ومعليش يعني، ممنوع أي حديث فيه كلمات من نوع منعطف خطير، مرحلة حساسة، ناقوس الخطر، ضرورة التلاحم، التضامن الوطني، لبنان الفريد من نوعه، خلص بطلولنا ياها هالعادة

ممنوع من هلق ورايح أي حدا، أي مواطن يقول انو عايشين عيشة كلاب، ليكو يا اخواتي، الكلاب عايشين وصدقوني آخر همهن، راسن مرتاح وماشي حالن.. انتو عايشين عيشة لبنان

عشتم... وعاش لبنان